- وصايا شاعر -

ساير زمانك لو زمانك تحداك
و اصنع لنفسك بين ربعك مكانه

و اصبر و لو حتى على المر هتاك
و جنب أقدامك مساعي الهيانه

الفقر ماهو عيب لو كان مبداك
الصدق و الإخلاص دام عندك أمانه

درب العلا محفوف دايم بأشواك
و الحظ يلعب دور لا الوقت زانه

و العز عز النفس والنصيحة ذا جاك
مو شرط أجيابك دراهم ملانه

ماحد يدوم و الباقي الله ياذاك
و الشخص صيته مافعل في زمانه

وانطق بما يرفع لدى الناس ذكراك
فالحر وزنه مانطق به لسانه

و وفي بوعدك واحفظ الله يرعاك
و ابعد عن اهل القلقله و الميانه

و الصاحب الوافي إذا يوم ناداك
لبه و لو تخسر حياتك عشانه

و الفسل لو تنخاه قفى و خلاك
لا تطلبه تأمن جروح المهانه

و لا تلوم أحمق إذا يوم عاداك
و لا تعاتب من يخون الأمانه

و لا تخلي النذل يمشي بممشاك
و لا تجالس عاشقين الخيانه

واصبر على خلك إذا يوم جافاك
لو هو يحبك صدق يرجع مكانه