تلميح

ياصاحبي اسمعني ترا الهرج تلميح
افهم كلامي وخذ خفايا اعلومه
العلم تقضبه الرجال المفاليح
اللي لهم عن فعلة الشين شومه
البحر خاين والعذارى سوابيح
ويغرق ترا من يجهل فنون عومه
والعمر يمضي وآخر العمر تلويح
ولافيه مخلوقن عرف وقت يومه
الناس واجد والعرب صيتها ريح
والحر تظهر فعلته وقت حومه
واجب ترا كسب الرجال الصناديح
اللي لهم لا كشر الوقت قومه
واللي عرض فعله بضاعة وتربيح
محدن يجي يمه ولا احدن يسومه
الطيب اليا جاك... نور ومصابيح
والا الردي لا اقبل يحرق سمومه
والحاجه اللي تعسرك صعبه تزيح
الا بكف اللي شديدة عزومه
انده بصوتك... وارفعه صوتك وصيح
محدن يجاوب دون شي ٍ يرومه
قليل في وقتك رجال ٍ زحازيح
وقتك ترا زود علينا رخومه
وياكثر منهم للمظاهر مشافيح
ناقص... ولايكمل سوى في حلومه
عن معرفة بعض البشر سو تنقيح
واحشم يدك عن كف ماهي امحشومه
النار ماتحرق سوى من بها يطيح
واللي كثر خيره يعيش بنعومه
احدن يلاعب سبحته بخاطر امريح
واحدن فركها لاتذكر همومه
وترا الرجل صندوق ماله مفاتيح
واجب عليه تكون نفسه كتومه
ماناخذ الامجاد من دون تصريح
يمناك تفعل واليسار امعدومه
واخر كلامي خوذها دون تلميح
منهو بغا العليا جفا لذ نومه

قد تتكرر الاقلام وتتلون محابرها على الصفحات ... ولكن وحدها الاقلام النابضة التى لا تتكرر ...
ويكون لحضورها معانى ... ولكلماتها صدى يتردد فى دواخلنا ... وقلمك يا الحنش من تلك الاقلام الراقية والمتميزة ...
اسجل اعجابى بتلك الكلمات النابضة ... وانتظر جديدك
ولك مني ارقى التحايا واعــــذبهـــا

اختي ملاك الروح لك تحياتي ياذوق